Ae Dil...

Arse baad ek chehra mann ko bhaya hai,

Ae dil is zindagi mein ye kaun aaya hai?

Apni parchai ki jagah kisi aur ka saaya hai,

Tanhai mien bhi kisika saath paaya hai.

Aaine ke saamne jab bhi khade hue,

Aks ko kyu badla badla paaya hai?

Gumgeen palo mein unhone hasaya hai,

Khushi ke lamho ka dugna lutf uthaya hai.

Sookhi si is besvaad zindagi ko,

Rango ki chaashni mein kisne dubaaya hai?

Ankahee mein lavzon ka ehsaas paaya hai,

Khamoshiyon ne ek naya geet gaaya hai.

Armaano ka bemol tohfa bhijwaya hai,

Sapno ko apni aarzoo se kisne sajaya hai?

Mushkilon ko jisne apna pata bataya hai,

Umr bhar ka hume humsafar banaya hai.
Unki ek aahat se aalam jagmagaya hai,
Har lamha yu khulke kyu muskuraya hai?

Kya humne apne saathi ko paaya hai?

Ae dil is zindagi mien ye kaun aaya hai??

 Sapna...

Yeh Dosti...

Wo tang karna teachers ko

Har waqt canteen mein matargashti

Laakh koshish kar lene par bhi

Apni pasand ki ladki nahi pat ti

Kitaab mein dilruba ka naam hota

Dil aur arrow ki drawing hoti

Chutti na milne ki dua karna

College bina life boring thi

Pariksha ki answer sheet mein bhi

Ek doosre ki nakal hi milti

Result ke din ajeeb sa darr

Pass ho ya fail, treat toh banti thi

Bewajah itni tasveerein khichi

Jab dil mein hi har yaad basti

Har cheez ka mol chahe ho

Un lamho ka koi mol nahi

Aankhon mein hazaaron sapne

Iraadon mein hamesha ek nayi masti

Duniya ki saari daulat se zyaada

Pyaari hai humein ‘Yaar Ye Dosti”…

Sapna...

Talaash...

Dafan ho gaye armaan saare,

Ab bachi bas ek saas hai...

Koi nahi  hai paas humaare,

Ek yaad humaare paas hai...

Ek umang phir bhi zinda hai,

Kuch sapno ki navaas hai...

Toote hue rishton se bhi,

Bandhi judne ki aas hai...

Ji liye bahut se ghumon ko,

Ab ek khushi ki aas hai...

Pee liye har zakhm ke aansoo,

Ab ek hasi ki pyaas hai...

Zamaane ke jitne hi zulm ho,

Himmat apne bhi paas hai.

Chahe Jaisa ho kal apna,

Ab rukna hume na raas hai..

Chalte rahenge sir uthake,

Mann mein naya ek saaz hai...

Safar ki shuruwaat ho hi gayi,

Ab bas manzil ki talaash hai...

Sapna...

Tu...

Duniya mein aaya akela tu,

Kyu aam zindagi jiyega tu?

Baant kar amrit muskaan ka,

Ghoot aansoo ke piyega tu.

Tabhi bhoolkar ehem apna,

Prem ka paath padega tu.

Laakh thokarein raah mein lage,

Gir kar bhi sambhal ke chalega tu.

Galatiyaan karke chota hua,

Toh unse seekhkar badhega tu. 

Har pehlu ko dekhkar bhi,

Kuch kisso se agyaat rahega tu.

Ruk na paayega chaah ke bhi,

Jeevan dhaara mein bahega tu.

Vikhyaat sab mein ho na ho,

Khaas kisike liye rahega tu.

Jeevan chaahe sabko na de,

Jaan kisiki banega tu.

Apne karenge naaz tujhpar,

Ek aisa kaam toh karega tu.

Duniya mein aaya akele magar,

Kyu aam zindagi jiyega tu?

Sapna...

Zindagi ka Niyam...

Jis baarish se dharti ki pyas bujhe,

Usse kai phool bhi khil jaate hai.

Baraste badalon ki boondon se,

Kaiyon ke aansoo dhul jaate hai.

Kisi nadi ke kinaare log,

Ghar basaa ke reh jaate hai.

Ufanti nadiya ke paani mein,

Kitno ke ghar beh jaate hai.

Dil se nikle kuch gaane,

Bahuton ki rooh ko choo jaate hai.

Kai dhune zubaan se nikal ke bhi,

Kitno ke kaano tak na pahuch paati hai.

Kuch log chot de kar bhi,

Dil ki gehraayion mein reh jaate hai.

Chand saalon puraane ghaav bhi,

Humeshe hare reh jaate hai.

Zindagi ka ajab niyam hai yeh,

Khushi ke sang ghum bhi aate hai.

Jeevan ki aakhri saas lete hue bhi,

Ek khwahish mann me le jaate hai..

Sapna...  

Parindey...

Khule aasmaan mein ude parindey,

Duniya se bekhabar parindey.

Apne parivaar ko sab kuch samjhe,

Aise hai nadaan parindey.

Pankh pasaare jab udne lagte,

Baadalon ko bhi cheer ke nikalte.

Hum mein udne ki chaah jagaate,

Khuli havaon ke aazaad parindey.

Khatra jab mandraane lage,

Khud ko bhi kurbaan kar de.

Apne bacho ki raksha karte,

Chote par jaabaaz parindey.

Tinko se apna ghar banaate,

Ghoslon mein apna jahaan basaate.

Humesha sabko pyaar sikhaate,

Nafrat se anjaan parindey.

Kyu na hum bhi inse seekhe,

Inki tarah khul kar jee le.

Chod ke gusse aur nafrat ka daaman,

Ban jaaye Aman ke Parindey...

Sapna...

Kuch Sapne...

Kai dafa hum mann ko samjha le,

Kadam kyu sambhal nahi paate?

Khwaabon se jee kyu hum behlate

Jab kuch sapne adhoore hi reh jaate.

Har din ek nayi leher uthe,

Naya josh, nayi umang jagaaye.

Chattano se takarakar bhi,

Har leher kyu kinara na paaye?

Duayein rab se hazaar maangte,

Khwahishon par kaabu kyu nahi paate?

Jab dil ke armaano ki mala sajaate,

Haqeeqat ki lau mein wo kyu jhulas jaate?

Dard kise yaha kum nahi milte,

Kise duniya ke gum nahi milte?

Phir bhi har zakhm ko sehkar,

Auro ke liye hum kyu muskuraate?

Bhool kar beete kal ki baatein,

Agle pal mein jeene lagte.

Sapno ko hum kyu panaah dete,

Jab sapne sapne hi reh jaate??

Sapna...

  

Jaane Kahaan...

Phir wahi shaam hai,

Phir wahi hai subah.

Yu toh sab hai yahaan,

Jaane woh hai kahaan..

Manzilein ek thi,

Raaste the juda.

Par kisi mod pe,

Humko milna toh tha..

Aankhon mein, khwabon mein,

Ek wahi aks tha.

Mere har marz ki,

Ek wahi thi dava..

Raah mein kho gaye,

Jaane dono kahaan.

Ab jo woh hai nahi,

Sab hai soona yahaan.

Na hai koi khushi,

Na kisise gila.

Khwahishein raakh hai,

Lavz hai bejubaan..

Sapna...