Kya hai?...

Hume toh gum sehne ki aadat hai

Auron se dukh baant ne ki zaroorat kya hai?

Humse kehte hai, mann ki baat keh do

Kaam na aaye, woh dost kya hai?

Har dost beech raah mein chod gaya

Ab sahare ki hasrat kya hai?

Tanhai mein aksar sochte hai

Mukammal na ho, wo mohabbat kya hai

Jab humare dildaar hi dard de

Toh gairon ki nafrat kya hai?

Pyar ke naam har khushi kar di

Isse zyada unki ibaadat kya hai?

Unki bewafai pe bhi pyaar aata hai

Dil se koi aur shikayat kya hai?

Aankhe moond kar unke peeche chalte rahe

Isse badhkar yakeen hi hadh kya hai?

Jo kareeb the, unhe humse juda kar dia

Ae khuda! teri nazron mein barkat kya hai?

Muskuraa kar haathon mein kaante de gaye

Isse khoobsurat kisiki nazaakat kya hai?

Umr bhar hum ek rishte ko taras gaye

Isse lambi koi muddat kya hai?

Hume toh gum sehne ki aadat hai

Auron se dard baant ne zaroorat kya hai...

Sapna...

Gum ho Gaye...

Kabhi bina thake baatein hoti

Kabhi ghanto tak khamoshi hoti

Ab jaise lamhe gumsum ho gaye

Zindagi ki daud mein kuch dost gum ho gaye..

Kahi hasi ki sunehri dhoop khilti

Kahi aansuon ki bauchaar hoti

Wo pal ab guzre mausam ho gaye

Zindagi ki daud mein kuch dost gum ho gaye..

Ek doosre ko bewajah cheda karte

Par mushkil mein dhaal ban jaate

Har raah mein wo humkadam ho gaye

Zindagi ki daud mein kuch dost gum ho gaye..

Kabhi sapno ki unchi udaan hoti

Kabhi unse zameen ki pehchaan hoti

Wo manmarziyo ke aalam kho gaye

Zindagi ki daud mein kuch dost gum ho gaye..

Kuch naye bane, kuch purane ho gaye

Kuch poori tarah anjaane ho gaye

Kuch hum se main aur tum ho gaye

Zindagi ki daud mein kuch dost gum ho gaye..

Har saal aata hai Dosti ka din

Guzar jaata hai unhi ke bin

Ab yaadon mein wo meetha marham ho gaye

Zindagi ki daud mein jo dost gum ho gaye...

Sapna...

Khwaab keh dia...

Rishton ki talvaarein bahut chali

Par ghayal hume bas ek ne kia.

Kar ke kuch lamhon ki muh dikhayi

Tanhaiyon ka neg de dia.

Muskaan ki dastak ka intezaar tha
Maayusi ne gruhpravesh kar lia.
Phoolon se saja har sapna tha
Pal mein kaanto ka dher kar dia.

Kaatil ko phir bhi sukoon na mila
Humari tadap ko usne dekh lia.
Karte nahi dushmano ke saath aisa
  Jo usne humari mohobbat ka sila dia.

Ab kya mol humare itezaar ka
Jab unhone rishte ko zaleel kar dia.
Humare jazbaat ka mazak banakar
Kisi aur ko dil ke kareeb kar dia.

Ek pal ko kamzor hue, phir use dekha
Phir honsla apne dil ko de dia.
Humne aaina dekh ke haqeeqat ka
Uski qurbat ko khwaab keh dia.

Sapna...

Kya Maanga Tha...

Jab aapki zindagi ka hissa bane

Socha nahi tha itna zyaada maanga tha

Apni har hasi aapko deke

Aapke aansu lene ka vaada maanga tha

 

Kareebiyan chahe badhti na rahe

Dooriyon ka silsila kabhi na maanga tha

Jashn-e-zindagi mein chahe na mile

Aapki tanhaiyon ka tukda zyaada maanga tha

 

Humare har pal ke moti ko pirone

Aapke waqt ka dhaaga maanga tha

Pyaar toh kisise mil jaata hume

Umr bhar dosti ka iraada maanga tha

 

Din, mahine, saal yuhi guzar rahe

Inhe aapke saath jeene ka vaada maanga tha

Aaj yaad karte hai beete lamhe

Sochte hai...

Sach mein kya humne kuch zyaada maanga tha?

 

Sapna...

 

 

Koi khaas...

Yu toh shaadi ka rishta khaas maana jaata hai

Sabse khoobsoorat ehsaas kaha jaata hai

Koi kaise apne itne kareeb ho jaata hai

Ki door rehna bhi na gavaar ho jaata hai

 

Kuch waqt meri shadi ka bhi beeta hai
Mera bhi kisine dil pyaar se jeeta hai

Par ab koi aur bhi khaas aaya hai

Jo meri har saas mein saas leta hai

 

Jab wo meri taraf pyar se dekhta hai

Narmi se apne haath in gaalo pe rakhta hai

Saara samay usi mein kho jaata hai

Jab wo godh mein karwat badalta hai

 

Har waqt mera saath chahta hai

Duniya jhume jab wo muskuraata hai

Dil mein ek teer sa tez chubh jaata hai

Jab uska ek aansuu aankh se gir jaata hai

 

Meri aankhon mein khudko dekhta hai

Bhaaga sa aake mujhe gale lagaata hai

Har baar khaas tohfa mujhe de jaata hai

Jab apne andaaz mein mujhe 'mumma' keh jaata hai

 

 

Sapna...