Jee kiya...

Aaj sard hawaon ne yu chua

Bachpan ki subah ka abhaas hua

Use gale lagaane ko jee kiya

Phir school jaane ko jee kiya

Bina mann woh bistar se uthna

Maa ke jaate hi phir se sona

Neend se jagne ko jee kiya

Phir school jaane ko jee kiya

Uniform ko bewajah kosna

Colour dress pehen ne ka wait karna

Tang mozon se ladne ko jee kiya

Phir school jaane ko jee kiya

Class mein kahi khoye rehna

Tiffin kholne ko lalchaana

Doston se dabba churane ko jee kiya

Phir school jaane ko jee kiya

Janamdin ka intezaar karna

Toffiyan paake bahut khush hona

Happy birthday sunne ko jee kiya

Phir school jaane ko jee kiya

Bejhijhak apne yaar banana

Utpatang se kaarnaame karna

Maasoom sa hone ko jee kiya

Phir school jaane ko jee kiya

Kuch kho jaane ka ehsaas hua

Wo beparwah din ab aur kahaan

Khel, koodke din bitaane ko jee kiya

Aaj phir school jaane ko jee kiya

Sapna...

Abhi abhi..

Abhi abhi aankh khuli thi

Abhi kuch mehsoos hua

Abhi toh sab suhaana sa tha

Manzar badal gaya abhi abhi

Duniya yu toh thi hari bhari

Phir pragati ka aghaaz hua

Kohre sa chaaya hai dhua

Yahaan saaf hawa thi abhi abhi

Jiski sadiyon se pooja ki

Us kudrat ko hi dagaa diya

Gandagee se sab bhar diya

Ganga behti thi abhi abhi

Baari toofan aur zalzalon ki

Berukhi ka yu intekaam liya

Veeraniyon ne ghar basa liya

Gulistaan saja tha abhi abhi

Abhi toh chaayi khushi thi

Kisi godh main kheli thi

Jism toh cheer diya usne

Aatma bhi chill gayi abhi abhi

Hai nasoor milte gali gali

Hai kitno ka imaan bika

Haiwaniyat ne kabza kar liya

Insaaniyat rehti thi abhi abhi

Sapna...

Kaun hu main?

Aaj dil mein sawal utha

Kaun hu main? ye mujhe bata...

Honthon pe muskaan

aankhon mein nami thi

Bidaai mein samajh aaya,

Papa ki main jaan hu.

Maa ki shaagird

unke jeevan ki poonji

ban jaati unki dost kabhi

Kabhi hoti unki saas hu

Khoon ki rishtedaari

par jaan se badhke yaari

unse milti riyaayatein

Beheno ke sar ka taaj hu

Uski aankhon ki chamak

har shaitaani ki saathi

saath dekhte kai sapne

Bhai ki humraaz hu

Kismat ne milaaya

unki hu main sangini

takleefon mein shakti

Pati ke dil ka karaar hu

Jija ki teekhi mirchi

Bhabhi ki 'meri saheli'

jinko daant ke puchkaarti

Beto ki main dhaal hu

Dil ke kai rishton mein

shaamil bhi hai dosti

unse hai zindadili

Yaaron ki muskaan hu

kabhi bacchhi, kabhi daadi

kabhi apni hi azaadi

kabhi naachu kisi dhun pe

kabhi sufi sa saaz hu

kabhi rangeen, kabhi ghumgeen

kabhi sakht, kabhi pyari si
Kabhi hansaake maar du
Kabhi khud hoti naraaz hu

Kabhi khatti, kabhi namkeen
Behadh meethe ki shaukeen

Zindagi ke har zaayke se bhara

Main khushnuma andaaz hu

Sapna...

Jaane do...

Aaj mann ko udd jaane do...

Jharokho se bahut dekh liye 

Guzarte hue kai mausamo ko

Aaj zara pankh pasaar kar

Mann ko kahi udd jaane do

Kehte hai manzilein milti hai

Apna kar naye raaston ko

Aaj taqdeer se takraa kar

Manzil ko apni ore mudd jaane do

Saathi nahi har raah mile

Dekh lo hawa paraston ko

Aaj zindagi ko gulzaar kar

Ghumon ki chinta udd jaane do

Hawa mein pheli khushbuyein

Saanse chakhti un zaayko ko

Lab chuyein muskuraa kar

Ehsaas ka meetha gudd khaane do

Jism hai jakde bediyon mein
Rooh na jaane paabandiyon ko
Begaano se khud ko judaa kar
Khudko khudse judd jaane do

Sapna...

Tumhari yaad...

Sannate mein meri aankh khuli

Ek awaaz se meri neend jagi

Jaane kaun chod gaya dar par

Tumhari yaad si mujhe woh lagi

Chukar main dekhu toh sahi

Hai wahi ya ab badal gayi

Mulaayam sa ehsaas tha uska

Resham mein ho jaise lipti hui

Bakse mein kuch cheezein thi

Khola toh kuch tasveerein mili

Koi mol kya lagaye ab inka

Jinse jhalakti hai sirf zindagi

Hai usme ek dibiya choti si

Jisme kaid hai teri woh hasi

Banaavat ki usme goonjaish kaha

Khare sone si thi woh khari

Magan ho kar main jhoom uthi
Mann mein thi yaadon ki khushi
Aur kuch khojti us tohfe mein
Us se pehle hi aankh khul gayi

Sapna..

Chichore..

Daud bhaag wali zindagi se

Chalo kuch lamhe churaate hai

Aao yaaron hum milke

Phir se chichore ban jaate hai

Apne ghum ko sabse chupaake

Khushiya hum bikhere jaate hai

Par jab college ke saamne se guzre 

Humare lamhe phir jee jaate hai

Tum sabki baatein, masti thahaake

Soch ke hum muskuraate hai

Jaane aise saal suhaane

Itni jaldi kaise guzar jaate hai?

Parivar, pati, patni aur bacche

Sabke saath waqt bitaate hai

Rehte humesha jo dost dil mein

Unhe kyu nahi mil paate hai?

Jeete the hum bhi beparwah se

Woh mizaaj phir dohraate hai

Zimmedariyon se chutti leke

Chalo phir se chichore ban jaate hai...

Sapna...

Na nahi....

 Bhule se un galiyon se guzarna nahi

Meri yaadon se takra na jao kahi

Us jharokhe pe nazar daalna nahi

Meri baaton se phir mulakaat ho na kahi

Tanhayi mein mera khayal karna nahi

Chehra mera saamne aaye na kahi

Mere saath ki khushi na manana kabhi

Meri judaai ka gum sataaye na kahi

Mere pasand ke gaane gungunana nahi

Kaano mein meri awaaz goonje na kahi

Tasveer ko meri kareeb se dekhna nahi

Aankhein meri sawaal kar de na kahi

Sapno mein mujhse milna na kabhi

Khayaalo pe mera kabza ho na kahi

Meri mushkilon ka hal talashna nahi

Meri takleef teri uljhan bane na kahi

Mere chutkulon pe phir hasna nahi

Meri hasi se mann khilkhilaye na kahi

Apni dil mein khaali jagah rakhna nahi

Phir zindagi humse milaye na kahi

Sapna...

Verses 2

Tooti hui khwahishon ka gam na kar

Bikhre sheeshe nazron ko heero se dikhte hai

Khel toh yeh nazariye ka hai

Warna raavan aur ram, dono bazaar mein bikte hai..

Sooraj ke doobne se maayoos na ho
Andhere mein, akele mein, jee bhar ke ro
Jab tu doosro ki ummeed se halka ho jayega
Tabhi apni sabse oonchi udaan le payega

Kehte hai ishq se door raho
Yeh aag hai, jalakar raakh kar degi 
Bina jazbat ki toh sirf laash hoti hai
Jo aakhir mein khaakh hi banegi

Sochti hu yaha kuch nahi rakha
Kyu na is tamaashe ko khatm kiya jaaye
Par us masoom ko kaise du dhokha 
Jo har subah bas mujhe dekhke muskuraye

Kaisi yeh azaadi...

Haan, mana ki hume mili hai azaadi

Par kuch baatein mere mann ko hai sataati

Yeh desh, yeh watan hai toh mera bhi

Apni hi bhasha mein baat kyu na kar paati?

Main hu jain, main ahinsavaadi

Kyu apne dilon mein, mujhe na jagah di?

Bachpan se ki humne padhai likhai 

Na karne par milti thi maar ki mithai

Aaj ke baccho ki kaisi yeh padhai

Jo nakaam hone pe jaan suli pe chadhayi

Beti ko bachaya humne betiya padha li

Atma rakhsha ke liye classes bhi laga li

Phir bhi us shikaari ko daya aayi na zara bhi

Kaise haiwaano ke beech betiyan badha li

Jinhone jeevan diya, jeene ki wajah di

Us baap ko beti ne neend ki goliyan di

Darr tha na mann mein, na khauf zara bhi

Papa par hi kaise usne churiya chala di

Na mann mein umang, na khushiyon ki vadi

Dharti ke swarg ko ghere hai aatankwadi

Bemani jang mein khoon ki nadiyan baha di

Kya zindagi ki keemat hi rahi na zara bhi

Socha hi nahi tha aise hoti hai azaadi, 

Jaane phir kaisi hoti hogi barbaadi.
Kaash kudrat koi karishma dikhaati
Bat jo chuke humein phir judna sikhaati..

Sapna...

Verses...

Kisiki aankhon mein gehraayi na rahi

Kisiki baaton mein sacchai na rahi

Kaamyaab ho gayi khudgarzi is kadar
Dhoop mein bhi saath, parchaayi na rahi

Kabhi thali mein ghee mil jaata hai
Kabhi chano se kaam chalana padta hai
Namkeen aansuon ko pekar bhi
Meetha sa muskurana padta hai

Sar utha, uth aur chal de
Honsla yu kamzor kyu hai
Dil khol, apna haal bol de
Teri chuppi mein shor kyu hai

Begunaah ko saza hote dekha
Kayi apno ko khote dekha
Yu laga maine kisiko paa liya
Jab apne kandhe par use rote dekha

Gairon ki wah waahi mil jaaye
Aise mashoor shaayar na the
Husn ke darr se chupa karte the
Warna aise hum kaayar na the

Mann ki baat...

Kuch bete ki dekhbhaal hoti hai

Kuch uska pyaar hume mil jaata hai

Kuch kitabon ke panno mein 

Humara waqt yuhi beet jaata hai

Subah se shaam intezaar karte hai

Kaisa yeh ajeeb sa naata hai

Lautke bhi woh sangdil sanam

Khana khaake so jaata hai

Na koi baat hoti yaha waha ki

Na koi tohfa humare liye aata hai

Rasgulle, namkeen, chaat bhi

Mann ka zaayka na badal paata hai

Takhte hai jharookhe se askar

Apna koi nazar kaha aata hai

Hume dekh kar ajnabee sa koi

Saamne se guzar jaata hai

Pyaar se hume bhi dekh lo kabhi

Itne mein aapka kya jaata hai

Badle mein koi ummeed na karna

Ab bhaav khana hume bhi aata hai

Sapna...

Papa...

Papa apni godh mein,

Jab bhi sulaaya aapne

Gavaa kar apni neendein,

Mere sapno ko jagaaya aapne

Papa apne haathon se,

Jab bhi khilaaya aapne

Har swaad zindagi ka,

Pyar se chakhaaya aapne

Papa mere bachpan mein,

Jab jhoola jhulaaya aapne

Pareshaani ko bhool ke,

Mast hona sikhaaya aapne

Papa meri galtiyon pe,

Jab kuch na kaha aapne

Auron ki baatein na sunke,

Khud pe bharosa karaaya aapne

Papa jab mujhe chot lagi,

Aur haath badhaaya aapne

Kaanton, thokaron se na darr ke,

Aage badhna sikhaaya aapne

Papa meri shaadi karke,

Jab bidaa kar diya aapne

Jataaya nahi pyaar kabhi,

Dil se na bhulaaya aapne

Papa mujhe andheron se,

Roshni mein laaya aapne

Sab chale gaye haath chod ke,

Bas saath nibhaaya aapne

Papa meri har dua mein,

Pehle naam kamaaya aapne

Apna sab kuch lutaaya mujhpe,

Kabhi na haq jataaya aapne...

Tap tarang...

Is duniya mein jeev koi,

Kaise bhookha reh paaya?

Jain kul mein janme jo,

Wohi jaane tap ki maaya.

Khaake pee ke, mauj manaake,

Is tan ko bahut rijhaya.

Par tap karke, bhakti karke,

Jeevan ka saar samajh aaya.

Ekaasan, ayambil, upvaas se,

Dhul gaye mann aur kaaya.

Khoja khushi ko har kahi maine,

Magar tap mein sukh ko paaya.

Waqt mila nirjhara karne ka,

Saadhna karne ka mauka paaya.

Teerthankaro ka charitra padhkar,

Aatma ko humne upar uthaaya..

Ahinsa hi hai parmo dharam,

Yahi hume bachpan se sikhaya.

Tap karke, kevalgyaan paaya,

Yuhi nahi woh Mahaveer kehlaaya.

Tap ki tarang mein jo baha,

Wahi parmaatma ke kuch paas aaya.

Is Jain dharam mein jamn mila,

Tabhi jeevan sabse khaas paaya...

Sapna.. 

Zidd hai..

Aapne bhi bade hi pyaar se 

Kya iltejaa humse kar li

Haste haste baaton baaton mein

Hafto ki doori yuhi maang li

Humne bhi mann mein thaan li

Zidd hai khudko aazmaane ki

Dil cheer karke bhi aapko 

Judai tohfe mein de jaane ki

Na chalkega ek bhi aansoo

Na koi fariyaad ab niklegi

Sacche hai humare jazbaat gar

Doori aapko bhi sataayegi

Palko mein na neendein hongi

Saasein lagengi bahaane si
Waqt se har pal guzarish hogi
Is riyaayat ka dard bhulane ki

Har baar parvaah ki auro ki

Na fikr ki is dil bechare ki

Zulm toh kiya khoob aapne

Ijaazat bhi na di khafa hone ki

Humesha aapki khushi maangi

Na chaah ki kabhi kuch paane ki

Na kahoge jaane ko ab kabhi

Zidd hai itna yaad aane ki...

Sapna..

Sarhadh pe..

Aaj desh humara rota hai

Ki khoya phir ek beta hai

Tu kyu maayoos hota hai?

Ki sarhadh pe woh khada hai

Bhaarat ki darti phir laal hai

Phir bicha aatank ka jaal hai

Tu kyu khauf se behaal hai

Ki teri raksha karne woh ada hai

Kafan baandhe sar pe woh jaata hai
Laut ke aaunga yeh keh jaata hai
Tu ab uske liye palke bichaata hai
Jab woh tirange mein lipta pada hai

Aisi ghatna hoti har saal hai
Har seene mein chubhti ye bhaal hai
Un veeron ka jazba bemisaal hai
Jinka naam sunehre lafzon mein gada hai

Ab humko na sehemna aata hai
Dil mein badle ka gubbaar ban aata hai
Un shaheedon ka hum sab se naata hai
Hume ek karne woh chithdo mein udhada hai

Sapna..

Yeh Kya hua...

Yeh mera dil mujhse aaj poochta,

Mere desh ko yeh kya hua?

Khilkhilati dhoop thi saji kabhi yaha

Khet mein kisaan jab beej bo raha

Jo tha annadaata poore desh ka

Woh daane daane ko mohtaaj ho raha

Bacchon ki kilkariya goonjti yaha

Unki shaitaaniyon se mast tha sama

Shiksha ka mandir hum sabka jo tha

Masoom jismo ka wahi lahoo beh raha

Diwali pe pataakhon ka shor tha

Holi pe pyaar ke rango ka zor tha

Apnepan ki galiya thi, kaise ghul gaya

Khushnuma hawaon mein barood ka dhua

Seva karne ko humne jise chuna tha

Wahi neta aaj humpe raaj kar raha

Koi insaan kahi sadak pe so raha

Wo bas apni tijoriyo ko bhar raha

Kya unka bhi aisa hi khwaab tha

Jinhone hume gulami se azaad kar diya

Kehte wo aaj, dekh kar yaha waha 

Mere desh ko yeh kya ho gaya.??

Sapna..

Shukriya...

Ae khuda, tera shukriya...

Shukriya ki mujhe pyaar diya

 Khushi chaahne wala parivaar diya

Warna matlab ki duniya mein kitno ko

Apno ne jeete jee maar diya

Shukriya ki mujhe awaaz di
Jo gavah hai mere har ehsaas ki
Warna kai aise hai jo sunte nahi
Anoothi sargam jeevan ke saaz ki

Shukriya ki mujhe ghar mila

Thali mein khana pet bhar mila

Warna naseeb ke maare kaiyon ke

Haath ka nivaala, muh ko na mila

Shukriya ki meri santaan hai
Jisne dil ko rakha jawaan hai
Warna aise bhi maa baap hai
Jo bas daulat ki khaan hai

Ab har bhool ke liye sharminda hu
Shukriya ki main azaad parinda hu
Na beemariyon ne mujhe kaid kiya
Shukriya ki main aaj bhi zinda hu!

Sapna..

Manzil ki ore...

Aankhon mein khwaab ka diya jalaaye

Haathon mein thaame honsle ki dor

Dil mein lekar apno ki duayein

Chal pade hum khwaabon ki ore

Na dar laga hume andhere se

Na dehla paaya hume koi shor

Kaano mein ghoonjte haseen nagme
Jinse jee ho gaya harsh vibhor

Ek mod par, ped ke niche tehre

Takh te rahe asmaan ke taaron ki ore

Aankh lage toh manzar kho jaaye

Na jaane kab ho jaaye bhor

Raah mein khushbu se bhari hawaayein
Vaadiyon pe chayi ghata ghanghor
Phir jo hui yaadon ki barsaatein
Mann naacha jaise mast magan mor

Bina ruke, bina thake phir badhte rahe

Na hone diya iraade ko kamzor

Kuch kadam ki doori pe hum the

Us lakshya ko paa chuka tha koi aur

Naakaamyabi se jo toot jaaye

Woh musafir hoga koi aur

Hum toh sapno ka basta uthaaye 

Chal denge ek nayi manzil ki ore.. 

Sapna..

Shaitaan...

Bura Jo hua, unhone kiya

Phir use kyu laaj ka tokra diya

Kab tak woh andhere mein roye

Kyu auron ke zulm ka bojh dhoye

Begunah hokar bhi saza mili
Haivaano ki toli ghoomti khuli
Har nazar us se sawaal karti chali
Kyu usi par uthi har ungli

Ab bhi kya koi aake samjhaye
Hum insaan hone ka farz nibhaye

Ungli na uthaye, haath badhaye

Sar uthakar use jeena sikhaye

Jab jab kisika shoshan hua kahi
Sansani woh khabar ban gayi

Desh jagaa, mombattiya bhi jali

Ab bhi peedita ban rahi gali gali

Betiyon ko hum swa-raksha sikhaye
Swatantra, nidar, nirbhay banaye
Beton ko bhi yeh paath padhaye
Jo ladki ka sammaan na kare,
Woh aadmi nahi shaitaan kehlaye

Sapna..

Kehte hai aansoo..

Ek nanhi jaan ke aate hi

Aankhon se chalak aate hai

Jigar ke tukde ki bidai mein

Bin pooche bebaak baras jaate hai

Azeez khilone ke khote hi

Bacche ki masumiyat ban jaate hai

Mil jaaye jab jaadu ki jhappi

Khilkhilati muskaan ban jaate hai

Khwaab koi jo dagmagaaya ho
Haqeeqat ki pehchaan ban jaate hai
Jisne apno ka saath paaya ho
Uski berok udaan ban jaate hai

Toota koi pyaar bhara Dil ho

Ghum ka paigaam ban jaate hai

Haqeeqat bani koi khwahish ho

Poora hua armaan ban jaate hai

Sarhad pe shaheed koi jawaan hua

Desh ka maatam ban jaate hai

Barse ambar se barkha ki boond

Khushiyon ka mausam ban jaate hai

Kehte hai aansoo, hum paani nahi

Har pal nayi kahani ban jaate hai

Jo samjha, jaan paaya wahi

Jazbaat ki zubaan bhi ban jaate hai

Sapna..